Սիրելի՛ գործընկերներ, զգուշացե՛ք. ապրիլի 1-ից 8-ը կրթահամալիրն անցնում է «Ռոդարիական խառնաշփոթ» ռեժիմի։
Մենք որոշել ենք գլխիվայր շրջել առօրյան ու կոտրել բոլոր կարծրատիպերը: Երբևէ պատկերացրե՞լ եք, թե ինչպես կարող է պատմության կամ հասարակագիտության դասավանդողը մտնել քիմիայի լաբորատորիա և ոգևորված փորձանոթներ իրար խառնել, կամ ինչպե՞ս մաթեմատիկոսը կվերլուծի Չարենց՝ հաշվելով բանաստեղծության ռիթմի ալգորիթմը: Իսկ գուցե կավագո՞րծը վերցնի զոդման սարքն ու անցնի մետաղին:
Ժամանակն է դուրս գալ հարմարավետության գոտուց և փորձել սեփական ուժերը բոլորովին անսպասելի դերում: Ապրիլի 1-ից 8-ը ձեր դասարանը կամ արհեստանոցը զիջեք մեկ ուրիշին, իսկ ինքներդ «գրավեք» որևէ նոր տարածք:
Ջանի Ռոդարիի «Երևակայության քերականություն» մեթոդիկան հենց դրա մասին է՝ կոտրել կարծրատիպերը, ստեղծել անսովոր իրավիճակներ և տեսնել, թե ինչ նոր ու ստեղծագործական լուծումներ կծնվեն այդ «խառնաշփոթից»։
Նախագիծ. «Ռոդարիական խառնաշփոթ. Շրջված կրթահամալիր»
Ժամկետը՝ Ապրիլի 1-8
Մասնակիցները՝ Կրթահամալիրի դասավանդողներ, սովորողներ, ծնողներ, հյուրեր
Նախագծի նպատակը և խնդիրները՝
- Կարծրատիպերի հաղթահարում. դուրս գալ առօրյա, հարմարավետության գոտուց և փորձել սեփական ուժերը բոլորովին այլ ոլորտում։
- Ստեղծագործական մտքի խթանում. ռոդարիական հնարքների («ի՞նչ կլիներ, եթե…») կիրառում գործնականում։
- Միջառարկայական կապերի նորովի բացահայտում. օրինակ՝ ինչպե՞ս կարող է մաթեմատիկոսը մոտենալ գրականությանը, կամ ֆիզկուլտուրայի դասավանդողը՝ երաժշտությանը։
- Ուրախ և անկաշկանդ կրթական միջավայրի ստեղծում:
Նախապատրաստական փուլ (Մարտի վերջ)՝
- Վիճակահանություն կամ «Խենթ ընտրություն». Դասավանդողները նախապես քաշում են վիճակ, թե ապրիլի 1-8-ը որ առարկան են դասավանդելու (կամ արհեստանոցում ինչով են զբաղվելու)։
- Խորհրդատվություն. Օրինակ՝ մետաղագործը կավագործին կարճ էքսկուրս է անցկացնում անվտանգության կանոնների և նախնական հմտությունների մասին, որպեսզի գործընթացն անցնի և՛ ուրախ, և՛ անվտանգ։
Ընթացքը և հիմնական ուղղությունները՝
- Մասնագիտությունների խառնաշփոթ (Ապրիլի 1).Առավոտյան ընդհանուր պարապմունքին հայտարարվում է «շրջված» կանոնների մասին։ Օրվա կարգացուցակը նույնն է, բայց դասավանդողներն են փոխված։ Մաթեմատիկոսը փորձում է գրականության դասին երեխաների հետ հաշվել բանաստեղծության վանկերն ու ռիթմը, պատմաբանը ֆիզիկայի դասին պատմում է Նյուտոնի խնձորի պատմական նշանակությունը, իսկ կավագործն անցնում է զոդման ապարատին։
- Դերային շրջադարձ.8-րդ և 9-րդ դասարանցիները ստանձնում են դասավանդողի դերը Կրտսեր դպրոցում՝ փորձելով բացատրել բարդ երևույթները հեքիաթների կամ ռոդարիական հնարքների միջոցով։
- Ռոդարիական արհեստանոցներ.Նյութերի խառնուրդ՝ կավի և երկաթի համադրությամբ քանդակներ, նկարչություն ոչ ավանդական նյութերով (սուրճով, հողով, տերևներով)։
- «Ի՞նչ կլիներ, եթե…» բանավեճ-քննարկումներ.Հանդիպումներ, որտեղ քննարկվում են աբսուրդային հարցեր (Օրինակ՝ ի՞նչ կլիներ, եթե Արագածոտնի մարզում ձգողականության ուժը վերանար, կամ եթե բոլոր մարդիկ խոսեին միայն թվերով)։
Ամփոփում և ակնկալվող արդյունքներ՝
- Ապրիլի 8-ին կազմակերպել «Խառնաշփոթի ցուցահանդես», որտեղ կներկայացվեն կավագործ մաթեմատիկոսների կամ մետաղագործ բանասերների ստեղծած աշխատանքները։
- Նախագծի ողջ ընթացքի լուսաբանում, տեսանյութերի, ռեպորտաժների և հարցազրույցների հրապարակում սովորողների և դասավանդողների անհատական բլոգներում։
- Դասավանդողների անդրադարձները. ի՞նչ նոր բան բացահայտեցին իրենք իրենց մեջ կամ գործընկերոջ առարկայի մեջ։